Welcomre to the Alexandria library science department Blog

مرحبا بحضراتكم في المدونة الرسمية لقسم المكتبات والمعلومات - جامعة الإسكندرية،و كم تسعدنا مساهماتكم وتعليقاتكم****تمنياتنا للجميع بعام دراسي موفق إن شاء الله

الخميس، يوليو 26، 2012

حكايتى مع الزمااااان( قصة كفاح أحد خريجي قسم المكتبات مع البطالة)




بقلمأحمد حسين عبده الجريتلي
مدير مركز امتياز لخدمات المعلومات
وأخصائي تكنولوجيا المعلومات بمصنع وادي الملوك 
ببرج العرب  
دى مش أغنية وردة , معلهش هى حكاية طوييييييلة شويتين بس كل واحد هيلاقى نفسه فيها ,دى  حكايتى وحكاية شباب كتير اتخرج ولسه فى الكلية وبيحلم أحلام كتير اوى نفسه يحققها فى وسط الظروف الصعبه اللى احنا فيها , ............ الظروف الصعبة !!!!!   هو أصلا فى ظروف صعبه ؟؟؟؟؟
آه طبعاٌ مفيش شغل , كل حاجه وحشة , الشغل عاوز خبره خمس  سنين على الاقل , المرتبات جمييييييلة جداً :), الشغل مش هينفع الا بواسطه , انا لسه صغير معنديش خبرة, ياعم وانا هشتغل دلوقتى ليه , انا فى الكلية دلوقتى ومش فاضى اخد كورسات او اطور نفسي لما اتخرج يبقى يحلها ربنا......... إلخ
اعتقد مفيش حد مسمعش الجمل دى سواء اتخرج او لسه فى ثانويه عامة او لسه فى الكليه وبيحلم يشتغل فى مكان كويس , وسط الطاقه السلبية اللى الناس اللى حوالينا مشحونين بيها وبيعدونا بيها لاننا بنسمحلهم انهم ينقلولنا الطاقة السلبية دى, ودايما ننسى ان فى رب اسمه الكريم ولكننا بنهمل حتة السعى شوية او فاهمينة بشكل خاطئ !
 انا كل يوم باكبر وبتعلم حاجات كتير اوى , ومن ضمن الحاجات اللى كنت بسمعها واكررها فى دماغى وببقى عارفها زى ناس كتيييييييير -ولكنى بعيد كل البعد عنها -هى فكره السعي وتطوير الذات وفكرة ان فعلا اللى بيسعى ربنا بيقف جنبه ويعطيله فوق ماهو متصور!
 قصتى بدأت وانا فى الكليه , خريج كلية الآداب قسم المكتبات والمعلومات بحلم اشتغل فى مكان كبير محترم , معتمد فقط على مواد الكلية اللى للأسف ممكن يكون فى جزء كبير منها قديم بالنسبه لعصرنا دلوقتى , وكنت مش بفكر الا فى ان انجح واعدى علشان اطلع اشوف واسطه اشتغل بيها فى مكان جااامد واقبض مرتب كبير واعيش حياتى بقى واتجوز زي كل الشباب.
 طلعت من الكلية عندي ثقة ، عملت سيرة ذاتية زى الفل ( 11 ورقة ) كنت واخد كورسات كده على قدى بس كتيرة ومُشَتته ومش مركزه فى مجال معين مليييييييييييت بيها السيرة الذاتية وكنت فرحان جدا انها كبيرة ونزلت اقدمها   فى اول مكان كنت بحلم اشتغل فيه وفضلت قاعد جنب التليفون مستنى وانا فرحان ومتحمس , شهر عدى ... معلش يمكن فى طلبات شغل كتيرة , شهرين ... معلش اكيد هيتصلوا بس مفيش فرص دلوقتى, تلات شهور.... أربع شهور.... خمس شهور.... ستة !!!!
 معقول كل ده ؟!!!! وبدأ يترسخ فى دماغى فكره الواسطه وانه انا خلاااااااااااااص مش هينفع اشتغل الا بواسطة . بدأت ابذل كل طاقتى عشان الاقى واسطة وفعلا نجحت انى اعمل كده وفجأأأأأأأأة قامت الثورة ( ثورة 25 يناير ) المحترمة . أول يوم عدى قلنا مظاهرات وهتعدى ،تانى يوم الموضوع سخن كل يوم الموضوع بيزيد اكتر انا قلت انى خلاص مش هششششششششششتغل انا لازم انسسسسسسسى موضوع الشغل ده تماااااااااما, وده لانى ركزت فقط على ان اللى هيشغلنى حد يعنى انا كنت معتمد على غيري , ونتيجة ظروف الثورة وان البلد وقفت فتره فغيري ده مقدرش يساعدنى ومكنش حد يقدر يساعدنى فى الدنيا دى كلللللللها الا ربنا سبحانه وتعالى !!! وبعده على طول :إمكانياتي .
قررت أعمل شغل خاص وهو تقديم خدمات معلومات للباحثين، وعملت مدونة على النت أعرض فيها خدماتي 

 وعملت  تسويق جاااامد جداً بكل الطرق ، لكن العائد كان أقل بكتير من المتوقَّع !
 جالي حاله من الاحباط لفتره قصيرة وبدأت أحاول أفوق من الاحباط ده بأنى افتكرت انى وانا صغير كنت بحب الكمبيوتر جدا وشاطر فيه ,بدأت اصلح اجهزة الكمبيوتر لأى حد اعرفه بدون مقابل ، وبعدين  قلت انزل اخد كورسات كمبيوتر اهو منها اخرج اتعرف على ناس جديدة ومنها اخد خبرات واتعلم علم جديد يمممكن ينفعنى , وكنت بقول يمكن كده وانا يعنى جوايا متأأأأأأأأأكد انه خلاص مفيش امل ,رحت الكورسات اتعلمت حاجات كتيرة اوى مليت السيرة الذاتية  اكتر ، بدأت ادور على شغل تانى وكل الشخصيات الايجابية اللى حواليا تطمني وتقولى:" يا ابنى دي فتره وهتعدى،  كلللللل الناس مرت بيها متتعبش نفسك ربنا شايلَّك حاجه كويسه" ؛
والناس السلبية تقولى العكس :"ياعم مفيش شغل ركز على الواسطة مش هتشتغل البلد واقفة" , وانا كنت واقع فى النص مش عارف اسمع كلام مين

 وصلت لفترة من أصعب فترات حياتى نفسيا بس فضلت آخد كورسات واقدم على شغل, بعدين صوَّرت بمبلغ كبير جدا نسخ من سيرتي الذاتية ونزلت اوزعها فى الشركات, اشتركت فى كلللللل مواقع التوظيف على الانترنت , قدمت فى كلللللل الشركات بشكل عشوائى وبشكل منظم وجربت كللللللللللللللللللللل حاجه ممكن أأأأأأأأأأأأي حد يتصورها لدرجه انى كنت بدخل للمديرين نفسهم.
 سعيت وتعبت بس العائد اللى جالى بعد الفتره دى هو عائد معنوى مش وظيفة او شغل, ولكن خبرة جديدة ربنا علّمها لى علشان شافنى باسعى ,
الخبره دى انا حبيت انقلها لكم علشان هتوفر عليكم فتره كبيرة من التعب,  ربنا حطنى على اول الطريق فكرت انى اتخصص بشكل افضل فى مجال التكنولوجيا والكمبيوتر وقررت انى ادرس واكمل دراستى فى المجال ده بشكل اكاديمى افضل ودخلت كلية العلوم قسم الحاسبات ،ولكن اتضح إني لازم أدرس أربع سنوات، فقررت الالتحاق بكلية الحاسبات وتكنولوجيا المعلومات بالأكاديمية العربية للعلوم والتكنولوجيا لدراسة الماجستير ، واتعرفت على ناس كتيره جديده وبدأت اذاكر وافهم لقيت انه كانت في حاجات كتييييييييييييير متخيل انى فاهمها وطلعت ولااااااا فاهم حاجه, لكن  العلم والدراسه شئ ممتع جدا , شئ ممتع لما تروح كل يوم كليتك حابب وواثق انك هتطلع متعلم شئ جديد هيخليك بكره أحسن ! ومع الاجتهاد والكفاح، الحمد لله  بدأت أتعلم وأفهم والحمد لله !
 بعد كده بدأت معارفى توسع فى المجال وبدأت علاقتى بالناس تكون اقوى ودائرة علاقاتى تزيد وبدأت أنضج أكتر، وفهمى للدنيا ونظرتى للأمور تتغير بشكل ملحوظ , وفضلت أسعى فى البحث عن وظيفة بشتى الطرق اللى ممكن اى حد يتخيلها ؛  يجيلى إحباط اقع وبعدها اقوم،  اقف تاني،  لغاية لما  احد اصدقائى شاف السيرة الذاتية بتاعتي قَدَراً وقالى السيرة دي وحشة جددددددددددددددددددددا " !

 انا طبعا دمى اتحرق وزعلت من الراجل وخدته على قد عقله وسبته يتكلم , أصل سيرتي  11 ورقه بحالهم!!!!  انا واخد كورسات ومظبط الدنيا , وبدأت اكبَّر دماغى من الفكرة ,
 وفضل الراجل يلح عليا وكأن ربنا باعتلي رسالة على لسانه يقولى السيرة الذاتية وحشة  ، مش هتشغلك لأنها مشمكتوبة  بالمعايير العالمية!
وبعدين مفيش شغل بواسطة انت واسطة نفسك,
 لِف واتعب واتبهدل.... انا سكت فتره وحاولت اغير طريقة تفكيري ، قلت: طيب ما اسمع صديقى ده هيقولى ايه , بدأ يقولى كل التفاصيل الخطأ فى السيرة بتاعتي  واللى هقولكم عليها طبعا كللللللللها فى حلقة جاية بشكل تكنيكى أفضل.
 المهم بدأ صديقى يقولى عدِّل هنا وهنا وهنا , اعدِّل وابعتهولوا يراجعه الاقى أخطاء تانيه , فجأه لما السيرة خلصت بصيت لقتيها صفحتين , قلت اكيد الراجل ده بيهزر !!!!
 بعدها احد اصدقائنا  من المتخصصين فى كتابة السير الذاتية ربنا بعتهالي وراحت بعد هذه التعديلات اضافت تعديلات اخرى اكثر احترافية وقالتلى ان فى حاجه اسمها  
Cover letter
او خطاب مرفق بالسيرة،  وده برضه هقولكم عليه فى الحلقة اللى جاية مع حكاية السيرة الذاتية بشكل ملخص ان شاء الله.
 خلصت السيرة الذاتية وقلت اجرب ابعت للشركات ،  فبعثت اول ايميل , جالى بعدها باربع ايام صديق عزيز ليا قالى انت اتقبلت فى الشركه عندنا وتعالى استلم الشغل يوم الأحد واعمل المقابلة الشخصية !!!
   ورحت واستلمت الشغل بدأت معنوياتى ترتفع اكثر فأكثر وثقتى فى نفسى زادت.

 وبدأت ادور فى اوقات فراغى على وظايف تانية اعلى لان الوظيفة اللى اشتغلتها ماكانتش فى تخصصى. وبدأ يجيلى تليفونات من شركات ومريت بالعديد من الاختبارات الشخصية  الكتيره اوى واللى نجحت فى معظمها وفشلت فى البعض الآخر نتيجه انى استهترت ايام ماكنت فى مرحلة الجامعه بدراسه اللغات والكمبيوتر بشكل قوي ودى الغلطة اللى بحاول اصلحها دلوقتي  
 ولكن الحمد لله دلوقتي باشتغل فى مكان بعيد شويتين والمرتب مش حلو تلات شويات
J  
 ولكن لابد من الاستمرار في  السعى،  مادام ربنا حطك على اول الطريق اتعلم وخد خبرة واستمر فى البحث ربنا هيعلِّمك ويفتحلك ابواب اكتر , احمد ربنا على النعمة واصبر وتأكد ان ربنا شايلك حاجه كبيرة جدا هيديهالك لو انت استمريت فى السعى بأمل في رحمته .
 انا بدأت اغير وجهة نظري تماماً تجاه فكره البحث عن وظيفة وربنا بدأ ييسرلى الطرق انى اقدر اساعد غيرى فى انه يشتغل ,
 وبدل ماكنت بدور لنفسى على شغل   ربنا فتح عليَّ وبقيت بدور لنفسى ولغيري وبالفعل اكتر من شخص اشتغلوا بفضل الله عن طريقي.

 ودلوقتي تفتكروا أنا بحكي الحكاية الطويلة العريضه دى لية؟؟؟؟
أولاً: لإنى مش عاوزكم تسمعوا اصواتكم الداخلية اللى بتنادى بالاحباط والفشل.
ثانياً: سدوا ودانكم عن الكلام السلبى والطاقة السلبية اللى حواليكم ودايما تَطلَّعوا للافضل واهم حاجه فى السعى هى الثقه فى الله  .
ثالثاً :كل تجربة فاشلة تمر بها هى فى الحقيقة نجاح مش واخد بالك منه بس هتشوفه  بعد كده  .
رابعاً : السعى مع الثقة فى الله هو أساس النجاح وتحقيق الآمال.
خامساً: تنمية مهاراتك وإوعى تعتمد على مواد الكلية فقط , طوَّر نفسك، انزل خد كورسات فى مجال معين عاوز تشتغل فيه، وياريت تكون بتحبه عشان تُبدع فيه  .
سادساً : اللغااات اللغاااات الللغاااات .
سابعا:  السيرة الذاتية والخطاب المرفق   أهم حاجتين  فى كل هذه القصه –بعد التوكل على الله - فَهُما عنوانك, تخيل انك بتدور على شقه فى جريدة من الجرائد تخيل أي اعلان هيلفت نظرك اكتر؟ الاعلان التقليدى العادى, ولا الاعلان اللى يشدك ويحسسك انه هو ده اللى انت بتدور عليه؟!
وأخيراً : الناس اللى ماعرفتش تشتغل وبتدَّعي ان مفيش شغل, انا اقدر ارد على آآآآآآآى حد فيهم اقولهم :
 " والله ،والله ،والله في  شغل كتير فى البلد بمرتبات كويسه ولايشترط الخبرة ولكن يشترط المهارة والإمكانات , فهل كل واحد منا معاه الإمكانيات دى؟
 لغات، كمبيوتر، ثقة بالنفس ،القدرة على التعامل مع الآخرين ؟!  
 هل انت عندك ده ؟
 لو الاجابة نعم , إلحَق اكتب السيرة الذاتية بشكل مناسب    علشان فى وظيفة مستنياك.
 لو الاجابة لأ :   إلحق خد كورسات ونمِّي قدراتك وانت برضه بتصلح سيرتك الذاتية و تطورها علشان فى وظيفه برضه مستنياك ،
وخليك دايما فاكر انت لو صاحب شركة مش هترضى تشغل اى حد عندك الا لما يكون متأكد انك 
هتعمل لُه اللى هو عاوزه !
و عاوز اشكر كللللللل حد وقف جنبى سواء  ساعدني او اهملني لان اللى وقف جمبى و ساعدنى
 مساعدة ايجابية ده دعمنى فى اوقات الشدة , واللى اهملني ساعدنى انى اكون عندى الخبره القليلة اللى بفيدكم بيها دلوقتى واللى من خلالها قدرت احس بذاتى واعتمد على نفسى .
ولا انسى الفضل اولاً واخيرا لكل من :
ربنا عز وجل فهو صاحب كل الفضل عليَّ.
أبي الفاضل ، وأمي الحنونة ، وأختي الطيِّبة
استاذتي الجميلة وأمى الفاضلة الدكتورة : اماني زكريا
زميلتى الصادقة ذات الوجه البشوش : أسماء ابو بكر
زميلتنا الجميلة المتفوقة : غدير مجدي .
وأيضا الكثير من الجنود المجهولين فى كليتي و كل الناس اللى ساعدتنى وانا مش حابب انى انسى حد.

استنوني  إن شاء الله  فى المره الجاية هقولكم ازاى تعملوا سيرة ذاتية بشكل صحيح   يساعدكم انكم تلاقوا شغل بجانب طبعا انكم تبنوا مهاراتكم , بس المره الجاية دى هتيجى بناءً على تعليقاتكم محتاج اسمع آراء الناس واى حد محتاج يسأل عن  حاجه أنا تحت امره.
أخوكم
احمد حسين الجريتلي
خرِّيج سنة2010

هناك 57 تعليقًا:

  1. هذا أول موضوع يُنشر عبر المدونة بالعامية المصرية، وعلى الرغم من احترامي وتقديري الشديدين للغة العربية وحرصي على عدم النشر إلا بها ، إلا أن كاتب المقال فضل نشره بالعامية ليكون أقرب إلى الشبابالذين يستهدفهم ؛ فلم أملك إلا أن ألبِّي رغبته ، فهو أحد ابناء القسم المتميزين أخلاقاً وعلماً ،
    وهو مشهور بحب الخير لكل الناس والتفاؤل والسماحة،
    وفقه الله وزاده تواضعاً وعلماً، وثقةً بالله تعالى ، وإصراراً على النجاح والتميُّز ، آمين .

    ردحذف
  2. السلام عليكم . انا احمد حسين صاحب المقال اتمنى ينول اعجاب الناس, وانا فعلا كنت مصر على نشره بالعامية بالرغم ايضا من احترامي للغتنا العربية , ولكن انا حبيت انى اكون اقرب لقلوب الناس فأنا اولا واخيرا شاب مثلكم , واشكرا استاذتى الجميلة د. اماني الردمادي على انها لبت رغبتي فى نشر المقالة بالعامية , واشكرها على مجهوداتها الملحوظة بالمدونة وعلى حرصها الدائم على ارضاءالزائرين بالمدونة ومتابعة ارائهم وتعليقاتهم.
    انا اتمنى ان اى حد عنده استفسارات يتواصل معي , وكل عام وحضراتكم بخير وصحة وسعادة وان شاء الله رمضان القادم , اللى لسه متخرجش يكون اتخرج واللى مشتغلش يكون اشتغل واللى مخطبش او متجوزش يكون اتجوز واللى لسه مرزقش بأولاد يكون رزق بأولاد , اتمنى السعادة للجميع
    احمد حسين الجريتلي

    ردحذف
  3. بار ك الله فيك إبني الفاضل، وتقبل دعواتك الطيبة ، وأثابك على نواياك الجميلة :)

    ردحذف
  4. هبه مصيلحي26 يوليو، 2012 1:40 ص

    السلام عليكم
    اولا بشكر حضرتك علي الكلالالالالالالالالالالالالام الجميل جدا ده
    ثانيا:حضرتك ربنا بعتك لنا ف الوقت المناسب: لاننا بجد محبطين جدا ع الرغم من اننا لسه طلبة بس الواحد محبط من قبل ما حتى يتخرج من كلام الدفعات اللي قبلنا واللي لسه مشتغلوش
    ثالثا: كنت عايزة اعرف من حضرتك ايه هي الكورسات اللي حضرتك أخدتها ف مجال المكتبات والمعلومات واللغات بالظبط
    رابعا:بشكر حضرتك جدا واتمنى تنصحنا دايما

    ردحذف
    الردود
    1. شكرا لمبادرتك بالتعليق يا هبه ، وإن شاء الله موفقة قبل وبعدالتخرج بإذن الله تعالى :)

      حذف
  5. بجد المقاله جميله جداااااااااااااااااااا وربنا يكرمه ويكرم د اماني جزاكم الله كل خير بجد استفدت منها اوي الواحد بجد يبقي محتاج حاجات تساعده وتخليه طموح خصوصا اني خريجه السنه ديه ونفسي اعمل حاجات كتير ربنا يكرمه وجزاكم الله كل خير
    منال عزام

    ردحذف
    الردود
    1. بارك الله فيك يا منال ووفقك ، السر هو : الكفاح مع الثقة في الله تعالى وعدم اليأس أبداً :)

      حذف
  6. زميلي العزيز وأخي الفاضل أحمد،

    كم أنا سعيدة جداً بك، أولاً لمثابرتك وعدم استسلامك لليأس، وثانياً لعرض تجربتك لتشجيع الزملاء الآخرين الذين يعانون من البطالة وقلة فرص العمل. وبالفعل يا أحمد أنت مثال للشاب المثابر المكافح، وفقك الله وأدام عليك النجاح، اللهم أمين.

    وأشكرك على ذكري بمقالك الرائع وإن كان دوري بسيط جداً جداً. فأنا لم أقم بشئ يُذكر.

    بارك الله فيك، وزادك من فضله وعلمه وكرمه، وأدام عليك النجاح والفلاح .. اللهم أمين.

    ردحذف
    الردود
    1. بارك الله فيك أستاذة غدير ، فقد اجتمعتي مع الإبن أحمد في مشروع تطوير مكتبات كلية الهندسة منذ عامين ؛ وكنتم وبقية الزملاء جميعاً فريق عمل متميز ، وفقكم الله جميعاً :)

      حذف
  7. حكايتك مع الزمان يقرؤها كل الشباب أنا شخصيا أستفدت منها الكثير وتحمل فى طياتها العديد من العِبر والمواعظ الهامة التى نفتقدها اليوم للأسف!,كتر الله من أمثالك وجعل الله الشباب مثلك واعى وعنده أرادة وطموح وأخلاص لفكرته,ثالثا: أدعو الله لك بمزيد من التقدم والنجاح والثبات وأن يوفقك الله دائما للخير فى حياتك العلمية والعملية آمين,,رابعا: أفتخر أن دفعتى( 2010 )تخرج منها شاب مجتهد وصبور وواثق بالله فى زمن تاهت فيه هذة المعانى!جزاك الله خيرا مرة ثانية ووفقك الى مافيه الخير .

    زميلتك : أميرة يحي أنور

    ردحذف
    الردود
    1. نعم يا أستاذة أميرة هو احد زملاء دفعتك المتميزين بابتسامته الدائمة وأخلاقة الرفيعة ، وفقكم الله جميعاً إلى ما فيه الخير.

      حذف
    2. السلام عليكم الرد بالاسفل :)

      حذف
  8. السلام عليكم استاذة هبة , انا اللى سعيد بحضرتك , ردك على المقال دليل انك شخصية ايجابية , الشخص اللى يقرا كل الكلام ده علشان عاوز يستفيد ويوصل لحل اكيد حد بيدور على سبيل وطريق انه يترقى فى حياته ويكون شخص افضل, وعلى فكره انا معرفكيش ولكن انت هتكونى كده فى يومن الايام وهو ليس ببعيد ان شاء الله,
    ثانيا بالنسبة للكورسات فى مجال المكتبات , انا انصحك بأنك تنزلي تدريب فى مكان ما وتشتغلى وان كان حتى بدون مرتب , تاني حاجه ادخلى على الانترنت واقرأى كتير جدا عن التخصص اللى انتى بتحبيه وشوفى التخصص ده رايح على فين وروحى انتى معاه شوفى الناس بره مصر بتفكر ازاى واقرى فى اى مقال تشوفيه التعليقات اسفل الموضوع هتلاقى نصايح ومعلومات لاتقدر بتمن خبرات سابقة للناس اللى بتكتب, تالت حاجه بالنسبة للكورسات انا دلوقتى معرفش ايه اللى ممكن يكون شغال كويس فى الكورسات لكن انصحك بمكتبة الاسكندرية ادخلى فيها اعرفى الدنيا ماشية ازاى, وهناك دورات مجانية مفيده جدا ياريت تخديها هى بتكون قصيره الدوره لمده اسبوعين او تلاته بمعدل تلات مرات او مرتين اسبوعيا , خدى اكتر من كورس ولكن مش مجرد شهادات فقط خلى عندك علم دائما بكل جديد ومتقدم , رابع حاجه باه بالنسبة للغه ادخلى على يوتيوب اكتبى voa او voice of america ده هتلاقى اخبار باللهجة الامريكية وهتلاقى الكلام مكتوب اثناء التحدث اقرى الكلام وركزى فى اللغة وحاولى تجمعى كلمات كتير , وايضا لو كتبتى Learning English هتلاقى واحد بريطانى اسمه Mr Dumpkin تقريبا هو مميز ويتميز بسهولته , وانا انصحك بانك تبدأى بالانجلش البريطانى , ولو هتاخدى كورس خدى كورس انجلش مش غالى لان الغالى والرخيص هيتساووا ببعض فى الاخر اذا ممارستيش اللغة . وانصحك كمان انك تسألى فى القسم اساتذتنا الافاضل على فكره المكتبات لان هما اديهم فى المجال وده شغلهم وهم ادرى ناس بده يعنى هما اهل الذكر ... وده الرابط بتاع الانجلش شوفى كل حلقاته http://www.youtube.com/watch?v=ohJCdihPWqc
    كل سنة وحضرتك طيبة

    ردحذف
  9. اذا سمحت استاذ احمد ممكن تقول لنا ايه الكورسات اللي اخدتها اذا سمحت
    منال عزام

    ردحذف
    الردود
    1. السلام عليكم الرد بالاسفل :)

      حذف
  10. استاذة منال
    السلام عليكم
    الكورسات اللى انا اخدتها كانت خاصة بمجال التكنولوجيا وده حاليا تخصصى اللى بدرسه وبشتغل بيه
    خدت كورسات فى الشبكات والصيانة وتصميم المواقع وحاليا ادرس بالكلية برمجه ونظم معلومات وقواعد البيانات , لو حضرتك عاوزه اسامى كورسات معينه بشهادتها فى مجالي انا تحت امر حضرتك

    ردحذف
  11. السلام عليكم استاذة غدير
    انا اللى بشكرك وعاوز اقولك ان ممكن حاجه بسيطة جدا تغير حياة انسان , فما بالك بالحاجات الكبيرة اللى زى اللى اتعلمتها منك... :)

    ردحذف
    الردود
    1. شكراً جزيلاً يا أحمد بارك الله فيك، فأنت أخي الفاضل ولقد تعلمت أيضاً منك المثابرة والأمل في وجود فرص العمل. فشكراً جزيلاً لك.

      حذف
  12. استاذة اميرة , ربنا يجازي حضرتك خير, والموضوع حلو علشان انتم بس اللى عيون حضارتكم جميلة فبالتالي بتشوفوا كل حاجه جميلة .
    ثانيا هذا رزق من الله سواء عليا او على من قرأه فالفضل فى الاول والاخر الى الله عز وجل

    ردحذف
  13. استاذتى وامى اماني
    شكرا للتواصل ومتابعة الموضوع :) جعله الله فى ميزان حسنات كل من يقرأه

    ردحذف
  14. بجد ميرسى جداًً على الموضوع الجميل ده واحنا بجد محتاجين ان حد يكون عنده خبره بالحاجات اللى هنمر بيهابعد التخرج ان شاء الله يفهمنا كويس نعمل ايه بالظبط عشان كل واحد فينا عنده طاقة وأمل جواه بس ممكن اول عقبة نقابلها تهد كل ده ... ربنا يكرمك ويوفقك فى شغلك وميرسى جداا على المقال الجميل ده واحنا فى انتظار باقى المقالات ان شاء الله
    هايدى ابراهيم

    ردحذف
    الردود
    1. شكرا لمرورك وتعليقك يا هايدي، لكن اسمحي لي أعترض على الجملة :"ممكن اول عقبة نقابلها تهد كل ده " لأنه من المعروف أن ((الضربة التي لا تقتلني تزيدني قوة))، ومهما تعرض مجهود ك لتدمير ينبغي أن ترتاحي قليلاً لتلتقطي أنفاسك ثم تعاودي البناء والكفاح حتى تصلي إلى هدفك إن شاء الله :)

      حذف
    2. تحت امر حضرتك يا فندم شدى حيلك وشدى من عزم اصدقائك وزمايلك دائما

      حذف
  15. مي عبدالله26 يوليو، 2012 5:57 م

    أولا:شكراعلي الموضوع الجميل ده بجد جاوبتلي علي اسئله كتير كنت عايزه اجابتها بس مشكلتي في اللغات انا مش عارفه اخد كورس انجلش فين وقرأت في احدي تعليقاتك ان كورس الانجلش الغالي ذي المش غالي كلهم بيتساو مع بعض دي بصراحه مش مفهومه عندي يعني مكان ذي مكتبه اسكندريه عايزه الكورس ده من المركز الامريكي وبصراحه كورسات انجلش هناك مكلفه جدا وانت فاهم فمش عارفه اعمل ايه طبعا ثانيا:انالو متقبلتش في مكتبه اسكندريه بجد معرفش هيكون ايه رد فعلي انا عارفه ان مشواري لسه طويل قوي علي كلمه ذي دي بس بجد دا حلمي من وانا لسه بقدم في الكليه

    ردحذف
  16. مي عبدالله26 يوليو، 2012 6:06 م

    في حاجه كمان يا استاذ احمد انا لسه مخدشicdl اولا لانهم قالو مش اجباريه علي سنه رابعه وثانيا قالو انها هتبقي 14مديول فقلت استني الاخيره اكيد هتبقي احسن المشكله اني برده مش عارفه اخدها فين وكل المراكز الي كانت بتدرس icdlلسه متعرفش حاجه عن الماستر وانا مش عارفه اعمل ايه ياريت لو تقدر تفدني في الموضوع ده

    ردحذف
    الردود
    1. السلام عليكم يافندم شكرا جدا لرد حضرتك . بالنسبة لكورس الانجلش انا كان قصدى فيه ان الكورس الغالى بيتساوى بالكورس اللى مش غالى ((( اذا لم تمارسى اللغة وتستخدميها بشكل دائم فى يومك))) ومكتبة اسكندرية مش شرط انك تكونى واخده الكورس من مكان معين المهم يكون الاكسنت بتاعتك كويسة وبتكلمى بشكل كويس وده هييجى مع التمرين الكتير وسماع القنوات الاجنبية المحترمة وممارسة اللغة , يعنى مثلا لو حضرتك بتروحى منطقه الاهرامات او الاقصر او اسوان هتلاقى ناس مش متعلمين بيكلمو العديد من اللغاات لان ده شغلهم ورزقهم منه , فانا بقول للناس متخدش كورس غالى فى الاول لان ده مش مهم المهم انك تمارسى اللغة , ثانيا المكتبة اللى يهمها هو التويفل وليس مكان الكورس , وبتاخد من درجه معينة فى التويفل, اما بالنسبة ل icdl ممكن تاخديها فى القوات المسلحة المنطقة الشمالية مركز الكمبيوتر اللى هناك كويس ومكان محترم , وكمان فى نيو هورايزون ولكن ده غالى شويه , بس بالنسبة للشهاده دى انصحك تاخدى فى مكان كويس لان دى بأه هيفرق فيها الشرح, وبعدها امتحنى الامتحانات هو مش صعب ومتهيألى لو وقتك فاضى دلوقتى ممكن تاخديها دلوقتى افضل علشان بعد كده يكون عندك وقت تاخدى كورسات اكتر :)
      ان شاء الله اسمع عن حضرتك خبر كويس قريبا
      ولكن رجاء ونصيحة لكل الناس التركيز على عمل سيرة ذاتية كويسة ده اهم حاجه ده عنوانك

      حذف
  17. مع الاسف يا استاذ احمد وبقول مع الاسف وانا مش متردده في الكلمه دي انا كل اهتمامي كان بالمذاكره وبس وليا ترتيب علي القسم وكل حاجه بس هيعملي ايه الرتيب ولا حاجه وشغلت نفسي اكتر بكورسات التنميه البشريه قوووووووي في اثناء الدراسه وسبت المهم خدت كورسات في موضوعات كتيره اوي في المجال ده (وياليتني )طيب هو انا هاتعبك معايا شويه ممكن تقولي علي مكان كويس اخد فيه كورس انجلش وياريت تحدد مكان كورس icdlلاني مش نم اسكندريه وبصراحه اول الشهر الكريم ما يخلص كنت هاجي وأسأل علي كل ده بس انت وفرت عليا مشاوير كتير اوي انا اسفه هتعبك معايا ولك مني كل احترام وربنا يقدرني واقدر افيد الناس واساعدهم زي حضرتك

    ردحذف
    الردود
    1. السلام عليكم يا فندم , انا اسف بس انا عندى اعتراض على كلمة ((( للأسف ))), حضرتك صح اهتمامك بمذاكرتك ده شئ متميز وانك يكون ليكى ترتيب ده شئ متميز اكتر وده دليل ان حضرتك شخصية ايجابية , ومش الترتيب هو اللى هيعملك , انصحك بقراءة الموضوع مرة اخرى هتلاحظى ان فى بعض الحاجات بين السطور تحوى فى طياتها معانى كبيرة , وهى فكره انك بتسعى وبتنجحى مش المشكلة الترتيب يطلعك قدام او لأ , انتى بتثبتى لنفسك ولربنا انك متفوقه وده هو اللى انا قاصده فى المدونه انا مقصدتش خالص ان الناس تسيب الدنيا وتاخد كورسات انا طلبت الناس تزود نفسها وانا بنصحك مليون مره كملى فى سكتك واجتهدى لان ده سعى زى مقلت والسعى بيختلف من شخص للتانى مش لازم كل واحد يسعى بنفس الطريق اللى انا سعيتله , انتى بتسعى فى سكتك دلوقتى وعلشان سعيتى واثبتي كفاءتك قدام نفسك وقدام ربنا , تأكدى انك لو كملتى على كده هيكون ليكى شأن عظيم فى يوم من الايام, اوعى تقولى للاسف دى تانى من فضلك على تفوقك فى الكلية وانا بدعو فى المقالة عدم السماع لاصواتنا الداخليه , زى انا ليا ترتيب بس هيعملى ايه يعنى, طبعا هيعملك كتيييييييييييييييييييييييييييييييييير بس لو فكرتى دلوقتى بالشكل ده فعلا مش هيعملك , بصى من الاخر فى واحد معروف اسمه الدكتور احمد عمارة كان بيقول ان الانسان بيكون زى ماكان بيفكر , يعنى اللى انتى بتفكرى فيه هو ده اللى هتكونى عليه وهيكون هو ده حياتك , اسمعى كلامى انتى انسانه متميزه وتسعى دائما للاحسن وهتكونى فى وضع يحسد عليه فى يوم من الايام,
      اما بالنسبة لكورس ICDL والانجليش انا شايف انسب مكان هو القوات المسلحة بالمنطقه الشمالية بمصطفى كامل المركز بتاعهم كويس وبيدى كورسات كويسه واسعاره فى الرنج المعقول , وربنا يقدر حضرتك وتقدرى تساعدي الناس ان شاء الله , ورجاااااااااء تفوقى فى دراستك اكثر واكثر واكثر واتمنى اسمع عن حضرتك خير قريبا ان شاء الله

      حذف
  18. متشكرة لرد حضرتك استاذ احمد بجد المقاله جميله وجاوبت لينا علي حاجات كتير في مقالتك وردودك زي ما مي قالت بصي يا مي انا سالت انا وصاحبتي علي موضوع التويفل بالنسبه لمكتبه الاسكندريه من قريب قال لينا استاذ شاغل هناك ان المكتبه بتاخد من درجه 500 في التويفل وكمان عرفنا انها بتاخد الشهادات المعتمده من امدست وهو نصحنا بجد اننا ناخد الاول كورس انجلش في مكان مش غالي لحد ما نوصل للمستوي 12 مثلا وبعد كده نروح مثلا امدست ونعمل اختبار تحديد مستوي واحتمال طبعا مستوانا ينزل طبعا للمستوي التاسع مثلا فنكمل هناك في امدست وناخد منهم شهاده التويفل وبكده وفرنا واخدنا الشهاده من مكان كويس واللي نصحنا بكده استاذ احمد بسيوني وهو خريج قسم مكتبات من فتره كبيره وشغال هناك في المكتبه انا حبيت بس اساعدك وربنا يوفقك وقالنا اننا ناخد في المنطقه الشماليه الكورس الانجلش وربنا معاكي وجزاك الله كل خير استاذ احمد لانك فتحت موضوع مهم بجد

    ردحذف
    الردود
    1. ربنا يجازى حضرتك خير على المعلومات المهمة دى اللى بتنفعينا بيها
      شكرا لردك

      حذف
    2. بجد الموضوع اللي اتكلمت فيه مهم وجميل اوووووووووووووووي وبكده بجد كل واحد بيقي عارف معلومه او حاجه بيقولك فجزاك الله كل خير انت ودكتورة اماني لان مقالتك استفدت منها بجد

      حذف
  19. جزاك الله خيرا استاذ احمد لقد اعطيتني دافع قوي وساكمل مشواري باذن الله وبعونه

    ردحذف
  20. ميرسي جدا لتعليق حضرتك دكتورة أماني ،وميرسي لك يا أستاذ أحمد .

    هايدي

    ردحذف
  21. ماشاء الله عليك بجد ربنا يارب يوفقك للاحسن وتكون ف تقدم دائما وعقبالنا كلنا يارب زيك كده ...........نيرة محمد

    ردحذف
    الردود
    1. شكرا يا استاذة نيرة , يارب نسمع عن حضرتك خير قريبا, ثقى فى الله

      حذف
  22. ما شاء الله ربنا يوفقك ومن نجاح لنجاح :)
    وعقبالنا احنا كمان وتكون مصر تقدمت ونلاقي وظيفة مناسبة بس في نفس مجالنا :)

    ردحذف
    الردود
    1. استاذة اميره , شكرا جزيلا, ان شاء الله وظيفتك مستنياكى, لاتقلقي, ثقى الله

      حذف
    2. إن شــاء الله ... ونـعــم بالله :)

      حذف
  23. موفقيييييييييين .... اختيار موفق :)

    Räumung
    Räumung Wien
    entsorgung wien

    ردحذف
  24. انا في اولى اداب علم نفس
    وحقيقي بحييك على المقاله الجميله والمدونه الأجمل
    وربنا يوفقك أخي الغالي :)

    ردحذف
  25. شكرا لك أستاذ عمرو المدونة تتشرف بزيارتك رغم انك خارج التخصص ، وشكرا لتعليقك الطيب

    ردحذف
  26. أ محمد العطاب
    مدرس مساعد بقسم المكتبات
    وعلم المعلومات بجامعة صنعاء
    قرأت القصة كاملة وفيها من الحكمة والخبرة ما ينفع الأخرين .. أتمنى من الطلبة الاستفادة من تجربة زميلهم والتحلي بالصبر والتفاؤل ..

    ردحذف
    الردود
    1. أهلا وسهلا بحضرتك ، حللت أهلاً ونزلت سهلاً

      حذف
  27. انا خريخة اداب قسم فلسفة عندى مواهب شهرية واعشق كتابة المقالات ومحاورة جيدة لاافكار لدى خطوط فى الرسم مش بطالة ولا اعلم كل هذا هيشغلنى ايه وازاى انا مش متفالة من حياتى

    ردحذف
    الردود
    1. جربي االنصائح المعروضة وربنا ييسر لك امرك

      حذف
  28. بجد كلام جميل اوي..طاقه ايجابيه هايله كلها طموح ..ربنا يوفقك ودايما في تقدم..انا كنت وصلت لمرحله اني بدأت اكره القسم من الطاقه السلبيه اللي الناس بيدوهالي..لدرجه اني كل ما اقول انا في قسم مكتبات بسمع اسطوانه من الاحباط بتقتل اي طموح في الدنيا..وحضرتك يا دكتور اماني كلام حضرتك قي اخر محاضره اداني شحنه أمل وبجد اتمنيت اني أرتقي بتفكيري زي حضرتك..ويشرفني جدا انك تكوني قدوتي..كل الاحترام والتقدير لحضرتك د.أماني الرمادي

    ردحذف
    الردود
    1. الحمد لله أنك بدأتي تنظري لتخصصك بشكل إيجابي، وأرجو من الله تعالى ان تكوني خيراً مني يا جهاد :)
      فقط ابذلي الجهد وتفائلي خيراً وسوف تنالي أكثر مما تتمنين إن شاء الله تعالى :)

      ويمكنك أيضا الاطلاع على الروابط التالية:
      http://alexlisdept.blogspot.com.eg/2012/03/blog-post.html

      http://ala-apa.org/newsletter/2011/07/01/why-i-love-the-library-profession/

      حذف
  29. احنا بنستمتع بكلامك وبنستفيد بعلمك..جزاكي الله عنا خيرا د.اماني الرمادي

    ردحذف
    الردود
    1. بارك الله فيكِ وزادك علما وأخلاقا ً

      حذف
  30. السلام عليكم
    ممكن تسعديني بجد
    انا نفسي ادرس علوم حاسب (قسم الرياضيات كلية العلوم)
    لكن مؤهلات العلمية للقبول تمنع ذلك
    فا انا خريج اداب عبري
    وطلبوا مني مؤهل علمي معترف بيه علشان ادرس دبلومة علوم حاسب في كلية العلوم
    ممكن تنصحيني اعمل ايه انا والله مش عارف ابدا ازي
    انا حزين امام عداد عمري الذي ينطلق نحو الكبر
    والسلام عليكم ......

    ردحذف
  31. بص يا سيدي :) ..... اولا لا تحزن :)
    ثانيا نصيحتي الاولى ليك انك تتوكل على الله كده وتمسح كل الافكار السلبية اللي من الشيطان اللى بتدعوك بالحزن واان عداد العمر بيجري. اطول ما الانسان فيه نفس طالع وداخل يقدؤ يبدأ ويعمل . والحمدلله انك بتبادر بالسؤال ودة اكبر دليل ان جواك نشيط وعاوز تعمل حاجة.
    بالنسبة لقرار انك تدرس احييك عليه، ولكن لا تتعجل في ذلك الا بعد التأكد تماااااااما من انك هتستفيد من درااستك والا فعلا هتضيع فترة تانية من عمرك.
    قدامك طريقين في علوم الحاسب:
    الاول: الدراسة الاكاديمية. ودي غالبا هتاخد فتره طويلة و هتكون اكاديمية اكتر منها عملية ولو هتنفع فى شغلك هتكون نافعه بدرجه اقل
    الثاني: وهو ان تحدد مجال معين في مجال تكنولوجيا المعلومات وتاخد فيه كورسات مكثفة كويسة وتمتحن امتحانات دولية وتتفرج على فيديوهات على النت. بمعني انك تشوف مرتاح لانهي مجال في علوم الحاسب ( برمجة. شبكات. تصميم مواقع. تطوير مواقع. سيكيوريتي...الخ ) لازم تعرف كويس جدا جدا قبل متدخل اى مجال فيهم.
    بالنسبة للاماكن الكويسة للدراسات العليا. ممكن تعمل دبلومة في الاكاديمية وبعدها ماجيستير ولكن التكلفة مرتفعه شوية.
    اما للكورسات وانا ارجحلك الحل ده لانه عملى لو بتدور على وظيفة هيساعدك. ممكن تدرس كورسات في الاكاديمية ميامي او بابور المياه. او مصطفى كامل القوات المسلحة. لو نيو هورايزون وبالنسبة لمواقع الكورسات لو احتاجتها ممكن تسألني.
    ولكن قبل ان تدخل اى مجال تأكد انك هتكمل فيه وهتحبه . وانا سعيد اوي ان في ناس ايجابية زيك بتسأل وعاوزة تنجح ؛)

    ردحذف
    الردود
    1. السلام عليكم
      استاذ احمد
      بعد التحية اروع ما كان في ردك علي كانت كلمة لا تحزن والحمد الله توقف الحزن وانا اشكرك ان منحتني الامل في بضع كلمات واسال الله الا يحرمك اجرها في الدنيا والاخرة .
      ادخل في الموضوع علي طول
      استاذ احمد كنت عوز اوضحلك امرين
      الاول
      ان قدرارتي لا تسمح بـ الدراسة العملية لـit لكوني معاق بصريا (ضعف شديد بالابصار) بصراحه انا خايف علي عيوني من هذه الدراسة لذلك قررت ان ادرس علوم حاسب اكاديميا بالرغم من الدراسة الاكاديمية عملية وعلمية ايضا لكنني اخترت علوم حاسب لانه متفرعه من(قسم الرياضيات كلية العلوم) فـ رضاي بضعفي ربما يعوضني او يمنحني الله النور للتفكير والتحليل والتطبيق افضل من القيام بالمهام it
      الامرالثاني
      انا بجد محتاج مؤهل علمي معترف بيه علشان يتم قبولي في الدرسات العليا في كلية علوم لانني لا استطيع تحمل التكاليف في التعليم الخاص بصراحه انا اقدر اتحمل اني اعمل دراسة تهميد ودبلومة في معهد خاص لكنني لا اتحمل تكاليف الدراسة حتي اصل الي الماجاستير في التعليم الخاص
      حضرتك نصحتني بالاكاديمية
      1-لكن شروط القبول في الاكاديمية طبقا لما هو منشور علي الموقع الخاص netانه لابد من الحصول علي مؤهل بكالوريس وانا ليسانس اداب وهوشرط الدراسة في علوم حاسب
      2-مفيش مكان ارخص من الاكاديمية بس معترف بيه فيالدراسات العليا لكلية العلوم مفيش حل تاني(كيف احصل علي مؤهل علمي معترف بيه حتي اكمل دراسات العليا في كلية العلوم)
      اسف علي الاطالة ...حاولت بالامكان تنسيق رسالتي فيكفي عناء ردك وقراتك لرسالنا
      وشكرا

      حذف
  32. السلام عليكم
    لاتعطني سمكة بل علمني كيف أصطادها
    لم نات الي هذا العالم من اجل انفسنا بل كلا منا هنا من اجل الاخر-جيف وارنر
    انت نستني خالص ....غي الحقيقة انا الان في الحالة المحيرة≥≤>=≠<>
    نقدّر جهودك المضنيةفلك منّا كلّ الثّناء والتّقدير.

    ردحذف